امریکی میڈیا کے مطابق ایران محدود تعداد میں آئل ٹینکرز کو آبنائے ہرمز سے گزرنے کی اجازت دینے پر غور کر رہا ہے، بشرطیکہ تیل کے کارگو کی تجارت چینی یوآن میں کی جائے۔
امریکی میڈیا نے ایرانی عہدے دار کے حوالے سے دعویٰ کیا ہے کہ یہ فیصلہ اس لیے زیر غور ہے کیونکہ تیل کی تجارت عام طور پر ڈالر میں ہوتی ہے۔
دوسری جانب فرانس اور اٹلی نے بھی اپنے بحری جہازوں کو آبنائے ہرمز سے گزرنے کی اجازت کے لیے ایران سے رابطہ کیا ہے۔
ایران کی ایئرلائنز ایسوسی ایشن کے ایک عہدیدار کے مطابق ملک میں چھ ہوائی اڈے دوبارہ کھول دیے گئے ہیں۔
ایرانی خبر رساں ادارے کے مطابق ان ہوائی اڈوں میں تہران کا امام خمینی انٹرنیشنل ایئرپورٹ اور مہرآباد انٹرنیشنل ایئرپورٹ شامل ہیں۔ اس کے علاوہ مشہد، بیرجند، گرگان اور زاہدان کے بین الاقوامی ہوائی اڈے بھی دوبارہ آپریشنل کر دیے گئے ہیں۔
ایسوسی ایشن کے سیکریٹری نے بتایا کہ ایئرلائنز اب ملکی اور بین الاقوامی پروازیں دوبارہ شروع کرنے کی تیاریاں کر رہی ہیں۔
