لاہور میں اپنے تین بچوں کے قتل کے الزام میں گرفتار خاتون کو عدالت نے 5 روزہ جسمانی ریمانڈ پر پولیس کے حوالے کر دیا ہے۔
پولیس کے مطابق اچھرہ کے علاقے میں خاتون نے مبینہ طور پر اپنے تین کمسن بچوں کو قتل کرنے کے بعد الزام سسرالیوں پر ڈالنے کی کوشش کی، تاہم تفتیش کے دوران اس کا دعویٰ غلط ثابت ہوگیا۔
تحقیقات کے دوران سامنے آنے والی ویڈیو میں ملزمہ پُرسکون انداز میں مختلف بیانات دیتی نظر آئی، جس میں اس نے بچوں کے قتل سے لاعلمی ظاہر کی اور واقعے کو پراسرار بنانے کی کوشش کی۔
پولیس حکام کے مطابق ابتدائی پوچھ گچھ میں ملزمہ زیادہ دیر تک حقائق چھپا نہ سکی اور آخرکار جرم کا اعتراف کر لیا۔ اس نے بتایا کہ وہ اپنے شوہر رمضان سے طلاق لے کر جھنگ کے ایک شخص سے شادی کرنا چاہتی تھی، تاہم اس کے بچے اس راہ میں رکاوٹ تھے۔
تحقیقات کے مطابق ملزمہ کے موبائل ریکارڈ اور سی ڈی آر سے بھی اہم شواہد حاصل ہوئے ہیں، پولیس کے مطابق ملزمہ اس وقت 5 روزہ جسمانی ریمانڈ پر ہے اور واقعے کی مزید تفتیش جاری ہے۔
