بنگلہ دیش کے دارالحکومت ڈھاکہ میں مسافر بس دریائے پدما میں گرنے کے نتیجے میں کم از کم 18 افراد جان کی بازی ہار گئے۔
بنگلہ دیشی میڈیا کے مطابق یہ حادثہ بدھ کی شام پیش آیا، جس میں اب تک 18 جاں بحق افراد کی تصدیق ہوچکی ہے۔
مقامی ریسکیو حکام کا کہنا ہے کہ شام تقریباً 5 بجے مسافروں سے بھری بس اس وقت بے قابو ہو گئی جب اسے فیری پر چڑھایا جا رہا تھا، اور یوں بس تقریباً 30 فٹ گہرے پانی میں جا گری۔ بس میں قریباً 50 مسافر سوار تھے، جن میں سے کچھ کو بچا لیا گیا جبکہ 18 افراد جاں بحق ہوگئے۔
حکام کے مطابق جاں بحق افراد میں خواتین بھی شامل ہیں، جبکہ زخمیوں اور بچ جانے والوں کو فوری طور پر اسپتال منتقل کر دیا گیا ہے۔ حادثے کے بعد چند مسافر تاحال لاپتا ہیں، جن کی تلاش کے لیے غوطہ خوروں کی مدد لی جا رہی ہے۔
حکام نے بتایا کہ خراب موسم، تیز ہواؤں اور بارش کے باعث ریسکیو آپریشن میں مشکلات پیش آ رہی ہیں۔
